ހައިރައިޒުން އިންތިޒާމުކޮށްގެން ކޮންމެ އަހަރަކުވެސް ބާއްވަމުން އަންނަ މޯލްޑިވްސް ލިވިން އެކްސްޕޯ މިއަހަރުގެ ފެބްރުއަރީ 27 އިން 29 އަށް ބާއްވަން ނިންމައި، އެކްސްޕޯގެ ޕާޓްނަރުންނާއެކު ސޮއިކޮށްފިއެވެ.
މިކަމަށްޓަކައި ޗަމްޕާ ސެންޓްރަލް ހޮޓެލްގައި މިއަދު ބޭއްވި ޚާއްސަ ރަސްމިއްޔާތެއްގައި 8 ވަނަ ލިވިން އެކްސްޕޯގެ މެއިން ސްޕޮންސަރެއްގެ ގޮތުގައި ހަމަޖައްސާފައިވަނީ މޯހަން މުތާ އެކްސްޕޯޓްސް ޕްރައިވެޓް ލިމިޓެޑެވެ. ކޯ ސްޕޯންސަރުންގެ ގޮތުގައި ހަމަޖައްސާފައިވަނީ އަލްޓެއަރ އަދި އަކުއާ ވިޓާ ރެޒިޑެންސްއެވެ.
ހައިރައިޒުން އިންތިޒާމުކޮށްގެން ބާއްވާ 8 ވަނަ ލިވިން އެކްސްޕޯއާ ގުޅޭގޮތުން މައުލޫމާތުދެއްވަމުން ހައިރައިޒްގެ ޑިރެކްޓަރ އޮފް އޮޕަރޭޝަންސް މުހައްމަދު ޝާމިން ވިދާޅުވީ މިއަހަރުގެ ލިވިން އެކްސްޕޯ ކުރިއަށްދާނީ ފާއިތުވި 7 އަހަރާ ވަރަށް ތަފާތުކޮށް ކަމަށެވެ. އެގޮތުން މިފަހަރުގެ ލިވިން އެކްސްޕޯގައި ގިނަ ބަޔަކަށް ބައިވެރިވުމުގެ ފުރުސަތު ފަހިކޮށްދިނުމަށްޓާކައި ދަރުބާރުގޭގައި އެކްސްޕޯ ބާއްވަން ނިންމާފައިވާ ކަމަށް ޝާމިން ވިދާޅުވިއެވެ.
މިފަހަރުގެ ލިވިން އެކްސްޕޯގައިވެސް ރާއްޖެއާއި ރާއްޖެއިން ބޭރުގެ ގެދޮރާ ބެހޭ މައުލޫމާތާައި، ގެދޮރު ގަންނަން ބޭނުންވާ އެހެނިހެން ސާވިސް ޕްރޮވައިޑަރސްގެ މައުލޫމާތުތައް ލިބިގެންދާނެ ކަމަށް ޝާމިން ވިދާޅުވިއެވެ.
ލިވިން އެކްސްޕޯއާ ގުޅޭގޮތުން ހައިރައިޒްގެ ޑިރެކްޓަރ އޮފް ސޭލްސް އެންޑް މާކެޓިން މަރިޔަމް މާއިޝާ ވިދާޅުވީ މިއަހަރުގެ އެކްސްޕޯގެ ޚާއްސަ ކަމެއްގެ ގޮތުގައި ބޭރުގެ ގައުމުތަކުގަވެސް މި ދާއިރާގައި ހަރަކާތްތެރިވާ ފަރާތްތަކުން ބައިވެރިވާއިރު، މިފަހަރުގެ އެކްސްޕޯގައި ސްރީލަންކާ އަދި މެލޭޝިޔާގެ ބައެއް ކުންފުނިތަކުގެ އުފެއްދުންތައް ފެނިގެންދާނެ ކަމަށެވެ.
އެހެންކަމުން ފެބްރުއަރީ 27 ވަނަ ދުވަހުން ފެށިގެން ތިން ދުވަހުގެ މުއްދަތަށް ކުރިއަށްދާ މި ލިވިން އެކްސްޕޯ މެދުވެރިކޮށް ގެދޮރާ ބެހޭ ގިނަ މައުލޫމާތުތަކެއް ލިބިގެންދާނެ ކަމަށް ހައިރައިޒުން ބުނެއެވެ. އަދި މިފަހަރުގެ އެކްސްޕޯގައިވެސް މިދާއިރާގައި ފުންނާބު އުސް ގިނަ ފަރާތްތަކަކުން ބައިވެރިވާނެ ކަމަށް ހައިރައިޒުން މައުލޫމާތުދެވެއެވެ.
