ކޮވިޑް-19 އާއި ގުޅިގެން ރާއްޖެއިން އެޅި ރައްކާތެރިކަމުގެ ފިޔަވަޅެއްގެ ގޮތުން ރާއްޖޭގެ މައި ބޯޑަރު ބަންދުކޮށް، އިގްތިސޯދު އެންމެ ބޮޑަށް ބިނާވެފައި އޮންނަ ސިނާއަތްކަަމަށްވާ ފަތުރުވެރިކަމުގެ ސިނާއަތް ވަނީ ހުއްޓުމަކަށް ގެނުވާފައެވެ. މުޅި މާލެ ސަރަހައްދު ލޮކްޑައުންކުރުމާއި ގުޅިގެން އިގްތިސޯދީ ހުރިހާ ހަރަކާތެއްހެން އޮތީ ހުއްޓުމަކަށް އައިސްފައެވެ. މިގޮތަށް ގިނަ ދުވަސްތަކެއް ވަންދެން އޮތުމަށްފަހު ރާއްޖެއިން ކޮވިޑް-19 އަށް އަލަށް ޕޮޒިޓިވްވާ މީހުންގެ އަދަދު ވަރަށް ބޮޑަށް ކުޑަވުމާއި ގުޅިގެން މާލެ ސަރަހައްދުގައި އިއުލާނުކޮށްފައި އޮތް ލޮކްޑައުންއަށް ލުއިތަކެއްދީ، މިމަހުގެ 15 ވަނަ ދުވަހު ރާއްޖޭގެ މައި ބޯޑަރު ހުޅުވާލައި އަނެއްކާވެސް ފަތުރުވެރިކަމަށް ރާއްޖެ ހުޅުވާލިއެވެ.
އެދުވަހުން ފެށިގެން މަދުމަދުން ނަމަވެސް އެކި ގައުމުތަކުން ރާއްޖެއަށް ފަތުރުވެރިން އަންނަމުންދިޔަ ނަމަވެސް ފަތުރުވެރިކަން ރަނގަޅުވާނީ ރާއްޖެއަކީ މިވަގުތު ފަތުރުވެރިން އައުމަށް ރައްކާތެރި ގައުމެއްކަމުގެ ޔަގީންކަން އެހެން ގައުމުތަކަށް ލިބިގެންކަމަށް ރައީސުލްޖުމްހުރިއްޔާ އިބްރާހިމް މުހައްމަދު ސޯލިހު މި ވަނީ ވިދާޅުވެފައެވެ. ރައީސުލްޖުމްހޫރިއްޔާ މިފަދައިން ވިދާޅުވީ މިނިވަން ދުވަހާއި ގުޅިގެން އެމަނިކުފާނު ދެއްވި ޚިޠާބުގައެވެ.
ރައީސްގެ ޚިޠާބުގައި ވިދާޅުވީ އިގްތިޞާދީ ގޮތުން ކުރިއަށް އޮތީ ދަތި އުންދަގޫ ދުވަސްތަކެއް ނަމަވެސް އުންމީދަކީ މިއަހަރުގެ ފަހުކޮޅަށްދާއިރު ފަތުރުވެރިކަން ރަނގަޅުވެ، އިޤްތިޞާދަށް ހެޔޮ ބަދަލުތަކެއް އައުން ކަމަށެވެ. އެހެންނަމަވެސް މިކަން ހާސިލްކުރެވޭނީ ބޭރު ގައުމުތަކުގެ ފުރިހަމަ އިތުބާރު ރާއްޖެއަށް ލިބިގެންކަމަށާއި، ޑޮކްޓަރުންގެ އިރުޝާދުތަކަށް ފުރިހަމައަށް ބޯލެނބުން މުހިއްމު ކަމަށް ރައީސް ސޯލިހު ވަނީ ވިދާޅުވިއެވެ.
ގައުމެއްގެ މިނިވަންކަމަށް ނުރަނގަޅު ނުފޫޒުތައް ފޯރުވަން އެންމެ ބޮޑަށް މަގުފަހިވެގެންދާ އެއްކަމަކީ އެ ގައުމެއްގެ އިގްތިޞާދަށް ކުރިމަތިވާ ހީނަރުކަންކަމުގައި ފާހަގަކުރައްވައި ރައީސް ވިދާޅުވީ ގައުމެއްގެ އިގްތިސޯދެއް ނެތް ކަމުގައިވާނަމަ އެގައުމެއްގެ މިނިވަންކަން އަބަދުވެސް ދާނީ ނުރައްކަލުގެ މިސްރާބަށް ކަމަށެވެ. އެހެންކަމުން މި ދަނޑިވަޅުގައި ގައުމުގެ މިންވަންކަން ރައްކާތެރިކުރުމަކީ އެމަނިކުފާނުގެ ކޮނޑުގައި އެޅިފައި އޮތް ވަރަށް ބޮޑު މަސްއޫލިއްޔަތެއްކަން ރައީސުލްޖުމްހޫރިއްޔާ ފާހަގަކުރައްވާފައިވެއެވެ. އަދި ބައިނަލްއަޤްވާމީ މުޖުތަމައުގައި ރާއްޖޭގެ އެންމެ މަތީ މަސްލަހަތު ޙިމާޔަތްކުރާނީވެސް، ސުލްޙަވެރިކަމާއި ހަމަޖެހުމުގެ މައްޗަށް ބިނާވެފައިވާ ހާރިޖީ ގުޅުންތަކުގެ ތެރެއިންކަމަށް ރައީސް ސޯލިހު ވިދަޅުވިއެވެ.
މީގެ އިތުރުން މި ހާލަތުގައި ގައުމުގެ އިގްތިސޯދު ކޮޅަށް ޖެހުމުގައި އެންމެން ނިކުމެ މަސައްކަތްކުރުމަށް ރައީސް ސޯލިހު ގޮވައިލެއްވިއެވެ. ވަކިން ހާއްސަކޮށް މިކަމުގައި ޒުވާނުންނާއި އަންހެނުންގެ ދައުރު ފުޅާކުރުމަށާއި، ރާއްޖޭގެ އެއްގަމާއި ކަނޑުގައިވާ ޤުދުރަތީ ވަސީލަތްތަކުގެ ނަފާ އިތުރުކުރުމުގެ މަސައްކަތް ފެށުން މުހިއްމުކަމަށް ރައީސްގެ ވާހަކަފުޅުގައި ފާހަގަކުރެއްވިއެވެ.
