ވެރިކަން ކުރަނީ ކޮން ޕާޓީއެއްތޯ އާއި ސަރުކާރުގައި ތިބީ ކޮން ބައެއްތޯ ބެލުމަކީ، ސިވިލް ސަރވިސްގެ ދައުރެއް ނޫން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.
ރައީސް މިހެން ވިދާޅުވީ ހިންގުމުގެ ދާއިރާގެ އިސް މުވައްޒަފުންގެ ހުނަރާއި ގާބިލުކަން އިތުރުކުރުމުގެ ޕްރޮގްރާމް އިފްތިތާޙު ކުރުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ސަރުކާރު މި ހިނގަނީ، ސިވިލް ސަރވިސް މުވައްޒަފުންނާއި، ސިޔާސީ މުވައްޒަފުން އެކުވެގެން އުފެދިފައި އޮންނަ އެއް އިންޖީނަކުން ކަމަށާއި އެ އިންޖީނު އޭގެ ފުރިހަމަ ބާރުގައި ހިނގާނީ، މި ދެ ބައިގެ މެދުގައި ރަނގަޅު، ވަރަށް ބަދަހި ގުޅުމެއް އޮވެގެން ކަމަށެވެ.
ވެރިކަން ކުރަނީ ކޮން ޕާޓީއެއްތޯ، ސަރުކާރުގައި ތިބީ ކޮން ބައެއްތޯ ބެލުމަކީ، ސިވިލް ސަރވިސްގެ ދައުރެއް ނޫންކަން ފާހަގަކުރައްވާ ރައީސް ވަނީ ސިވިލް ސަރވިސްގެ ދައުރަކީ، އެއިރަކު އޮންނަ ސަރުކާރެއްގެ ސިޔާސަތުތައް ތަންފީޒު ކުރުން ކަމަށް ވިދާޅުވެފައެވެ.
ރައްޔިތުންގެ އަޣްލަބިއްޔަތު ލިބިގެން، ވަކި މެނިފެސްޓޯއެއް ތަންފީޒު ކުރުމަށް، އެއިރަކު އުފެދިފައި އޮންނަ ސަރުކާރަކަށް، ސިވިލް ސަރވިސްގެ މުހިންމުކަން ބޮޑުވަނީވެސް އެ ސަބަބަށްޓަކައި ކަމަށްވެސް ރައީސް ވިދާޅުވިއެވެ.
ރައީސް ސާލިހް ވިދާޅުވީ މި ޚިދުމަތާއެކު ސަރުކާރު އޮފީސްތަކުގެ އިސްވެރިންގެ ޒިންމާ ކުރިއަށްވުރެ ބޮޑުވެއްޖެ ކަމަށާއި ރައްޔިތުންނަށް ޖަވާބުދާރީވާންޖެހޭ މިންވަރު އިތުރުވެއްޖެ ކަމަށެވެ.
އަދި އަޑުއަހަންޖެހޭ ޝަކުވާތައް ގިނަވެ، ޙައްލު ހޯދައިދޭންޖެހޭ މައްސަލަތައް އިތުރުވެއްޖެ ކަމަށާއި އެކަމަށްޓަކައި، ސަރުކާރު އޮފީސްތަކުގެ ހުރިހާ މުވައްޒަފުން އެ ޚިދުމަތަށް އަހުލުވެރިވުމަކީ ވަރަށް މުހިންމު ކަމެއް ކަމަށްވެސް ރައީސް ވިދާޅުވިއެވެ.
ސަރުކާރެއްގެ ގޮތުގައި މަސައްކަތް ކުރުމަކީ، އެ ދައުލަތެއްގައި ޝާމިލުވާ އެންމެންގެ އަޑުއަހައި، އެންމެންގެ ކަންބޮޑުވުންތަކަށް ޙައްލު ހޯދައިދޭން މަސައްކަތް ކުރުން ކަމަށާއި ސަރުކާރުން ކަމެއް ނިންމާއިރު، އެއްގޮތަށްވުރެ ގިނަ ގޮތްގޮތަށް ވިސްނުން ގެންގުޅެންޖެހޭކަން ރައީސް ފާހަގަކުރެއްވިއެވެ.
އެހެންކަމުން، ސަރުކާރުގެ ސިޔާސަތު ތަންފީޒު ކުރުމަށްޓަކައި ތަފާތު ހުނަރުތައް ލިބިފައިވާ، ޤާބިލު އެތައް ބައެއްގެ ބައިވެރިވުން ސަރުކާރަށް ބޭނުންވާނެ ކަމަށް ރައީސް ވިދާޅުވިއެވެ.
ތަނުގައި މަސައްކަތްކުރާ މުވައްޒަފުންގެ އަޑު ކަނޑުވާލައި، އެ ފަރާތްތަކުގެ ފަންނީ ލަފާ ބޮލާލާޖަހައި، އެ މުވައްޒަފުން އޮފީހަށް ދީފައިވާ ޤަދަރު ކުޑަވާގޮތްގޮތަށް ލީޑަރުގެ ޢަމަލުތައް ހުރެއްޖެނަމަ، އޮފީހުގެ ވެރިންނާއި މުވައްޒަފުންނާ ދެމެދު އޮންނަންޖެހޭ ގުޅުމަށް ބުރޫއަރައި، އެންމެ ބޮޑަށް ބޭނުންޖެހޭ ވަގުތު، އެ މުވައްޒަފުންގެ އެ މުވައްޒަފުންގެ ފުލް ކެޕޭސިޓީގައި ނުލިބޭނެ ކަމަށް ރައީސްގެ ވާކަހަފުޅުގައި ވިދާޅުވިއެވެ.
އަދި މިގޮތަށް ކަން ކުރާނަމަ، އެ ލީޑަރަކީ ކޮންމެ އޮފީހެއްގެ ނުވަތަ ކުންފުންޏެއްގެ މީހެއް ކަމަށްވިޔަސް، އަދި ތަޢުލީމީ ގޮތުން ކިތަންމެ ފުންނާބު އުސް މީހެއް ކަމަށްވިޔަސް، އެތަނަކުން އެ މީހަކު ބޭނުންވާ ނަތީޖާ ހާޞިލުކުރުމަކީ ނާދިރު ކަމެއް ކަމަށް ރައީސް ވިދާޅުވިއެވެ.
މިޒަމާނުގެ ސިޔާސީ އަދި ޑިމޮކްރެޓިކް ނިޒާމުގައި ސަރުކާރު ހިންގާއިރު، ދައުލަތުގެ އޮފީސްތަކުގައި ދެ ބާވަތެއްގެ މުވައްޒަފުން ތިބޭނެ ކަމަށާއި އެގޮތުން ސިޔާސީ މުވައްޒަފުންނާއި، ސިވިލް ސަރވިސް މުވައްޒަފުންގެ މެދުގައި ގުޅުން އެހާ ރަނގަޅު ނޫން އޮފީސްތައްވެސް އެބަހުރިކަން ރައީސް ފާހަގަކުރެއްވިއެވެ.
މިއީ، ހަމައެކަނި ރާއްޖޭގައި މިއަދު ދިމާވެގެން އުޅޭ ކަމެއް ނޫން ކަން ފާހަގަކުރައްވާ ރައީސް ވަނީ ސިވިލް ސަރވިސް މުވައްޒަފުން ގޮވައިގެން، އެ ބޭފުޅުންގެ ޢިލްމާއި ތަޖުރިބާގެ ބޭނުން ހިފައިގެން، ވެރިކަމުގެ މި ދައުރު ނިމުމުގެ ކުރިން، ސަރުކާރުގެ ވަޢުދުތައް ފުއްދައިދިނުމަށް، އެންމެން ގުޅިގެން މަސައްކަތް ކުރުމަށް އެދިވަޑައިގެންފައެވެ.
