ދިވެހި ބަހުގެ އެކަޑަމީ އާއި ވީޓީވީ ގުޅިގެން ބިދޭސީންނަށް އަމާޒުކޮށްގެން ރަމަޟާން މަހު މުބާރާތެއް ބާއްވަން ނިންމައިފިއެވެ.
ދިވެހިބަހުގެ އެކެޑަމީގައި މިއަދު އޮތް ރަސްމިއްޔާތުގައި މުބާރާތުގެ އެއްބަސްވުން ރަމްޒުކޮށްދޭ ލިޔުމާއި މުބާރާތުގެ ގަވާއިދު ވަނީ ހަވާލުކޮށްފައެވެ.
ދިވެހި ބަހުގެ އެކަޑަަމީން ވީނިއުސްއަށް މައުލޫމާތު ދެމުން ބުނީ "ބިދޭސީން ދިވެހި ބަހުން ވާހަކަ ދެއްކުން 2022"ގެ ނަމުގައި ކުރިއަށް ގެންދަން ނިންމާފައިވާ މި މުބާރާތަކީ މުނިފޫހިފިލުވުމުގެ ބައިތަކަކާއިއެކު، ބިދޭސީން ދިވެހި ބަހުން ވާހަކަދެއްކުން، ބެލުންތެރިންނާ ހަމައަށް ގެނެސްދިނުމަށް ވީޓީވީ އާއި ގުޅިގެން އެ އެކަޑަމީގެ ފަރާތުން ގެނެސްދޭ ޕްރޮގްރާމެއް ކަމަށެވެ.
މި މުބާރާތާއި ގުޅޭގޮތުން މައުލޫމާތު ދެއްވަމުން އެކަޑަމީގެ ރައީސް ޑރ.އަޝްރަފް ޢަބްދުއްރަޙީމް ވިދާޅުވީ މުބާރާތުގެ މައިގަނޑު މަގްސަދަކީ ބިދޭސީން ދިވެހިބަހުގެ ހަމަތަކާއި އުސޫލުތަކަށް އަހުލުވެރިކުރުވުން ކަމަށެވެ. އަދި މި ހަރަކާތުގެ ސަބަބުން ދިވެހިންނަށްވެސް ބަހަށް އަހުލުވެރިވުމަށް ފުރުސަތު ލިބިގެންދާނެ ކަމަށްވެސް ޑރ. އަޝްރަފް ވިދާޅުވިއެވެ.
ޑރ. އަޝްރަފް ވިދާޅުވީ ބަސްބޭނުންކުރުމުގައި ބިދޭސީންގެ ކިބައިގަ ހުރި އުނިކަންތައް ރަނގަޅުކޮށްދެވޭނީ ސަރުކާރުގެ މުއައްސަސާއެއްގެ ބައިވެރިވުން އޮވެގެން ކަމަށެވެ.
މުބާރާތުން އެއްވަނައަށް ދާ ފަރާތަކަށް 10،000 ރުފިޔާގެ ފައިސާގެ އިނާމެއް، އަދި ދެވަނައަށް ދާ ފަރާތަކަށް 3000 ރުފިޔާގެ ފައިސާގެ އިނާމެއް ދޭން ހަމަޖެހިފައިވާއިރު ތިންވަނައަށް ދާ ފަރާތަކަށް 2000 ރުފިޔާ ލިބޭގޮތަށް ކުރިއަށް ގެންދަން ނިންމާފައިވާ މި ހަރަކާތުގައި ޖުމްލަ 5 އެޕިސޯޑް ގެނެސްދިނުމަށް ވަނީ ހަމަޖެހިފައެވެ.
މި މުބާރާތުގެ ފަނޑިޔާރުންގެ ގޮތުގައި ހަމަޖައްސައިފައިވަނީ ދިވެހިބަހުގެ ދާއިރާއިން ވަަރަށް ފުންނާބު އުސް ތިން ބޭފުޅުންނެވެ. އެއީ އަބްދުލްއަޒީޒް ޖަމާލް އަބޫބަކުރާއި އަންވަރު އިބްރާހިމް އަދި އައިމިނަތު ހަސަނެވެ.
މުބާރާތް ކުރިއަށް ގެންދަން ހަމަޖެހިފައިވާ ގޮތާއި ގުޅޭގޮތުން މައުލޫމާތުދެއްވަމުން ފަނޑިޔާރު އަންވަރު ވިދާޅުވީ، ބަހުގެ ހަމަ ހިފެހެއްޓޭނެ ތަފާތު ސެގްމަންޓްތަކެއް ހިމަނައިގެންކަމަށެވެ.
މި މުބާރާތް ކުރިއަށްގެންދަން ހަމަޖެހިފައިވަނީ މިކަމަށް އޮޑިޝަނެއް ބާއްވައިގެން ހޮވޭ މީހުންގެ މެދުގައި ކަމަށްވެސް ފަނޑިޔާރުންގެ ޓީމުން ބުނެއެވެ.
ބީދޭސީންނަށް އެމީހުން ގެންގުޅޭ ބެލެނިވެރި ފަރާތުން މި ފުރުސަތު ހޯދައިދިނުމަށްވެސް ފަނޑިޔާރުންގެ ޓީމުން އެދިފައިވެއެވެ.
މި މުބާރާތާއި ގުޅޭގޮތުން މައުލޫމާތު ދެއްވަމުން ވީޓީވީގެ ސީއޯއޯ މުހައްމަދު ޒަހީން ވިދާޅުވީ، މި މުބާރާތް ރާވާފައިވަނީ ހަމައެކަނި ދިވެހި ބަހުން ވާހަކަދެއްކުމުގެ މުބާރާތެއްގެ ގޮތުގައި އެކަނި ނޫން ކަމަށާއި މުބާރާތުގައި ގަވާއިދުގައި ހިމެނިފައިވާ ވަރަށް ގިނަ ކަންތައްތައް ކުރިއަށް ގެންދަން ނިންމާފައިވާ ކަމަށެވެ.
ސީއޯއޯ ޒަހީން ވިދާޅުވީ މުބާރާތުގެ ގަވައިދުގެ ބައިތަކާއި އަދި މިކަމުގެ ތަފްސީލް ކުރިއަށް އޮތްތާނގައި ވީޓީވީގެ ޕްރޮގްރާމްތަކުގެ ޒަރީއާއިން އެނގޭނެ ކަމަށެވެ. އަދި މިމައުލޫމާތުތައް ހިއްސާކުރައްވާނީ ބަހުގެ އެކަޑަމީގެ ބޭފުޅުންކަންވެސް ޒަހީން ފާހަގަކުރެއްވިއެވެ.
ހެއްވާ މަޖާ ބައިތަކާއިއެކު ކުރިއަށް އޮތް ރަމަޟާން މަހު ގެންދާ މިމުބާރާތުގެ ހޯސްޓަކީ ސޯޝަލްމީޑިއާގައި ވަރަށް މަޝްހޫރު މީހެއްކަންވެސް ޒަހީންގެ ވާހަކައިގައި ފާހަގަކުރެއްވިއެވެ. އެހެންނަމަވެސް ހޯސްޓަކީ ކާކުކަން އަދި ވަނީ ސިއްރެއްގެ ގޮތުގައެވެ.
ދިވެހި ބަހުގެ އެކަޑަމީ އާއި ވީޓީވީ ގުޅިގެން ތަފާތު ގިނަ ހަރަކާތްތަކެއް މީގެކުރިންވެސް ވަނީ ބާއްވާފައެވެ. އެގޮތުން އެންމެ ފަހުން ވާރޗުއަލްކޮށް ބޭއްވި އަދަބީ އީދަކީ ފާހަގަކޮށްލެވޭ މުބާރާތެކެވެ.
ޒަހީން ވިދާޅުވީ މި މުބާރަތަކީ ކާމިޔާބު މުބާރާތަކަށް ވާނެ ކަމާމެދު އެއްވެސް ޝައްކެއް ނުކުރައްވާ ކަމަށާއި، މިއީ މި ރަމަޟާން މަހު ވީޓީވީން ގެނެސްދޭ ޕްރޮގްރާމްތަކުގެ ތެރެއިން ބެލުންތެރިންގެ މެދުގައި ވަރަށް މަގްބޫލު ޕްރޮގްރާމަކަށް ވާނެކަމަށެވެ.
މި މުބާރާތުގައި ބައިވެރިވާން އެދޭ ފޯމު މިމަހުގެ 6 ވަނަ ދުވަހުން ފެށިގެން ދިވެހި ބަހުގެ އެކަޑަމީން ލިބެން ހުންނާނެއެވެ.
