2023ގަ ވެރިކަމުގައި އޮތުމަށް އެންމެ ބޭނުންވަނީ ޖުމްހޫރީ ޕާޓީ ކަމަށް ރާއްޖޭގެ ސިޔާސީ މަސްރަހް ދިރާސާކުރައްވާ ބޭފުޅުން ވިދާޅުވާ ކަމަށް ޖުމްހޫރީ ޕާޓީގެ ނައިބު ރައީސް އަހުމަދު ސައުދު ވިދާޅުވެއްޖެއެވެ.
ވީޓީވީގެ 'ފަސްމަންޒަރު' ޕްރޮގްރާމުގައި ޖުމްހޫރީ ޕާޓީގެ މަސައްކަތްތަކާ ގުޅޭގޮތުން ވާހަކަ ދައްކަވަމުން ސައުދު ވިދާޅުވީ ރާއްޖޭގެ ސިޔާސީ މަސްރަހުގައި މިއަދު ފެންނަނީ އެއް ވެރިއަކު އަނެއް ވެރިއެއްގެ މައްޗަށް ބަސްބުނާ މަންޒަރު ކަމަށާއި ގާސިމް އިބްރާހީމަކީ ބަދަލު ހިފުމުގެ ރޫހެއްގައި މަސައްކަތް ކުރައްވާ ބޭފުޅެއް ނޫން ކަަމަށެވެ.
އެހެންކަމުން ރާއްޖޭގައި ދެން ވެރިއެއްގެ ގޮތުގައި ހުންނަވަން ގާސިމް އިބްރާހީމް ނޫން އެހެން ބޭފުޅަކު ބޭނުންނުވާ ކަމަށް ސިޔާސީ މަސްރަހް ދިރާސާ ކުރައްވާ ވަރަށް ގިނަ ބޭފުޅުން ވިދާޅުވާ ކަމަށްވެސް ސައުދު ވިދާޅުވިއެވެ.
ރާއްޖޭގެ އިގްތިސާދު ބައްޓަން ކުރުމަށް މިއަދު ބޭނުންވަނީ އަމަލީ ގޮތުން މަސައްކަތް ކުރައްވާފައިވާ ބޭފުޅެއްކަން ފާހަގަކުރައްވާ ސައުދު ވިދާޅުވީ ގާސިމް އިބްރާހީމަކީ އެ ބޭފުޅާގެ އަމިއްލަ މަސައްކަތުން ވަރަށް ގިނަ ކަންތައްތައް ކުރައްވާފައިވާ ބޭފުޅެއް ކަމަށެވެ.
ދުނިޔޭގެ ބޮޑެތި ބޭންކްތަކުންވެސް ލޯނު ދޭނީ އެއްޗެއް ހުރި މީހަކަށް ކަމަށާއި ރާއްޖެއަށް އެ މަގު ހޯއްދަވައިދެއްވީވެސް ގާސިމް އިބްރާހީމް ކަމަށްވެސް ސައުދު ވިދާޅުވިއެވެ.
މި ޕްރޮގްރާމުގައި ވާހަކަ ދައްވަމުން ސައުދު ވަނީ ޕާޓީގެ އެތެރޭގެ ކަންތައްތައް ވަރުގަދަކޮށް ޕާޓީގެ މެނިފެސްޓޯއަށް ބޭނުންވާ މައުލޫމާތު އެއްކުރުމުގެ މަސައްކަތް ކުރަމުންދާ ކަމަށް ވިދާޅުވެފައެވެ.
އެގޮތުން އަންނަ ރިޔާސީ އިންތީޚާބަށް ތައްޔާރުވަމުން އަންނަންކަން ފާހަގަކުރައްވާ ސައުދު ވިދާޅުވީ ދާދި ފަހުން ޖުމްހޫރީ ޕާޓީގެ ޓީމެއް ށ. އަތޮޅަށް ޒިޔާރަތްކޮށްފައިވާ ކަމަށާއި މިހާރު ތައްޔާރުވަނީ ލ. އަތޮޅަށް ދިޔުމަށް ކަމަށެވެ.
ރާއްޖޭގެ އެކި ކަންކޮޅުތަކަށް ޖޭޕީގެ ޓީމުތައް ދަތުރުކުރަނީ މައިގަނޑު ދެ ބޭނުމެއްގައި ކަމަށާއި އެގޮތުން ރިޔާސީ އިންތިޚާބަށް ވާންޖެހޭ ތައްޔާރީތަކާއި އަދި ޕާޓީގެ އެތެރޭގެ އިންތީޚާބުތައް ބޭއްވުމުގެ މަސައްކަތްތައްވެސް މިވަގު ހިނގަމުންދާ ކަމަށްވެސް ސައުދު ވިދާޅުވިއެވެ.
ސައުދު ވިދާޅުވީ ގާސިމް އިބްރާހީމް މަސައްކަތް ކުރައްވަނީ އަމިއްލަ މަސްލަހަތަށް ވުރެ ބޮޑަށް ގައުމަށް ޚިދުމަތް ކޮށްދިނުމުގެ ނިޔަތުގައި ކަމަށެވެ.
