ދިވެހިރާއްޖެއަށް ތަރައްގީ އާއި ކުރިއެރުން ލިބެނީ ހަމައެކަނި ސަރުކާރުން ކުރާ މަސައްކަތުން އެކަނި ނޫން ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ވިލާ ކޮލެޖުގެ "ސްޓޫޑެންޓްސް އެޗީވްމަންޓް އެވޯޑްސް 2022" ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާގެ ނައިބު، ފައިސަލް ނަސީމް ވިދާޅުވީ ރާއްޖޭގައި ތަރައްގީއާއި ކުރިއެރުން އޮތީ ހަމައެކަނި ސަރުކާރުން ކުރާ މަސައްކަތުން އެކަނި ނޫން ކަމަށާއި، އަމިއްލަ ފަރާތްތަކުން ރާއްޖޭގެ ތައުލީމީ ދާއިރާ ފުޅާކުރުމަށްޓަކައި ކުރާ މަސައްކަތުގައި ބައިވެރިވެވަޑައިގެންނެވުމަކީ ޝަރަފެއް ކަމަށެވެ.
އެމަނިކުފާނު ވަނީ މަތީ ތައުލީމް ފުޅާކޮށް ހަރުދަނާ ރަނގަޅު ދަރީންތަކެއް ބިނާކުރުމަށްޓަކައި އަމިއްލަ ފަރާތްތަކުން ކުރާ މަސައްކަތް ފާހަގަކުރައްވާފައެވެ. ވިލާ ކޮލެޖަށް ގާތގަނޑަކަށް 15 އަހަރު ވެގެންދާއިރު، ހުނަރުވެރި ދަރިންތަކެއް އުފައްދާފައިވާ ކަމަށާއި، ސަރުކާރާއި އަމިއްލަ ކުންފުނިތަކަށް ބަލައިލިކަމުގައި ވިޔަސް ވިލާ ކޮލެޖުން ތައުލީމް ހާސިލްކުރި ދަރުވަރުން ފެންނަމުން ދާކަމަށެވެ.
ނައިބު ރައީސްގެ ވާހަކަފުޅުގައި އެމަނިކުފާނު ވަނީ ވިލާ ގްރޫޕްގެ ބާނީ ގާސިމް އިބްރާހީމް ކުރައްވާ މަސައްކަތްޕުޅު ފާހަގަކުރައްވައި އެމަނިކުފާނަށް ހާއްސަ ޝުކުރެއް ދަންނަވާފައެވެ.
މީގެއިތުރުން، އެމަނިކުފާނު ވިދާޅުވީ ތައުލީމީ ދާއިރާ ކުރިއެރުވުމަށް ދިވެހި ސަރުކާރުން އަމިއްލަ ފަރާތްތަކަށް އަބަދުވެސް ފުރިހަމަ އެހީތެރިކަން ފޯރުކޮށްދޭން ތައްޔާރަށް ތިބި ކަމަށެވެ.
ނައިބު ރައީސްގެ ވާހަކަފުޅުގައި އެމަނިކުފާނު ވަނީ ދަރިވަރުންނަށް ދެވޭ ތައުލީމާއި ތަމްރީންގެ ފެންވަރު ރަނގަޅު ކުރުމުގެ މުހިންމުކަމުގެ މައްޗަށްވެސް އަލިއަޅުއްވާލައްވާފައެވެ. އެގޮތުން، މީގެކުރިން ރާއްޖެއަށް ބޭނުން ނުވާ ތަފާތު އެކި ދާއިރާތަކުގެ ފަންނީ އަދި އިލްމީ ތަޖުރިބާ ލިބިފައިވާ މީހުން ބޭނުންވާކަން ފާހަގަކުރެއްވިއެވެ.
އެމަނިކުފާނު ވަނީ އެވޯޑު ހާސިލްކުރި ހުރިހާ ދަރިވަރުންނަށް މަރުހަބާ ވިދާޅުވެފައެވެ. އަދި ތައުލީމް އުނގެނުމަށް ދަރިވަރުން ކުރާ މަސައްކަތް ފާހަގަކުރައްވައި އެކުދިންނަށް ހިތްވަރު ދެއްވާފައެވެ.
