ދިވެހި ފިލްމް އިންޑަސްޓްރީގައި އުފައްދާ އުފެއްދުންތައް، ތިއޭޓަރއެއްގައި ބަލާލުމުގެ ފުރުސަތު ލިބެން އޮތް ހަމައެކަނި ތަން ކަަމުގައިވާ އޮލިމްޕަސް ސިނަމާގެ މަސައްކަތް ނިންމައި އަންނަ މަހުގެ 16 ވަނަ ދުވަހު އެތަން ހުޅުވުމުގެ މަސައްކަތްކުރަމުން އަންނަކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
މިނިސްޓަރ ޔުމްނާ މިހެން ވިދާޅުވީ، އޮލިމްޕަސް ނުހުޅުވި ގިނަ ދުވަސްތަކެއް ވަމުންދާތީ ފިލްމް އިންޑަސްޓްރީގައި ހަރަކާތްތެރިވާ ގިނަ ބައެއްގެ ކަންބޮޑުވުންތައް ހުރިކަން ފާހަގަކުރައްވާ، އެތަން ހުޅުވޭނެ ދުވަހެއް އޮޅުންފިލުއްވުމަށް މަކުނުދޫ ދާއިރާގެ މެމްބަރު މުހައްމަދު ރާއީ މިއަދުގެ މަޖިލިސް ޖަލްސާގައި ކުރެއްވި ސުވާލަށް ޖަވާބުދެއްވަމުންނެވެ.
ރާއީގެ ސުވާލަށް ޖަވާބުދެއްވަމުން ޔުމްނާ ވިދާޅުވީ، އޮލިމްޕަސް ޒަމާނީ ފެންވަރަށް ތަރައްގީކުރުމުގެ މަޝްރޫއުގައި ލަސްތަކެއް ވެއްޖެކަން ގަބޫލުކުރެވޭކަމަށެވެ. އެހެންނަމަވެސް އެކަން ދިމާވީ އެންމެ ފުރަތަމަ އަކޫސްޓިކް ޓްރީޓްމެންޓް ދިނުމުގެ ސާމާނު ގެނައުމަށް ހަވާލުކުރި ފަރާތުން، ފަހު އެކަން ނުކުރެވޭނެކަމަށް ބުނުމުން، އަނެއްކާވެސް އެކަން ކުރާނެ ބަޔަކު ހޯދަން ގިނަ ވަގުތުތަކެއް ހޭދަވުމުންކަމަށެވެ. އަދި އޮލިމްޕަހަށް ބޭނުންވާ ޒަމާނީ ފެންވަރުގެ ވަސީލަތްތައް ގެނައުމުގައި ލަސްތަކެއް ދިމާވުމުންކަމަށެވެ.
އެހެންނަމަވެސް މިހާރު ގިނަ ސާމާނު ގެނެވިފައިވާކަން ފާހަގަކުރައްވާ މިނިސްޓަރު ޔުމްނާ ވަނީ، އޮލިމްޕަސް ނިމޭއިރު އެތަން ހުންނާނެ ގޮތް ތަފްސީލްކޮށްދެއްވާފައެވެ.
ޔުމްނާ ވިދާޅުވީ، އޮލިމްޕަސް ޒަމާނީ ފެންވަރަކަށް ނިމިގެންދާއިރު، އިތުރު ވަސީލަތްތަކެއް އެތަނުން ލިބިގެންދާނެކަމަށެވެ. ފަންނާނުންނަށް، ފަންނީ ހުނަރުތައް ދައްކާލުމަށް ތަފާތު ޕްލެޓްފޯމްތަކެއް އެތަނުގައި ހުންނާނެކަމަށެވެ.
މިހާރު މަސައްކަތް ކުރަމުން ދަނީ ޑިސެމްބަރު 16ވަނަ ދުވަހު އޮލިމްޕަސް ހުޅުވާލެވޭނެ ހަފްލާއެއް ބޭއްވޭތޯކަމަށް ނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ވިދާޅުވިއެވެ.
ކޮވިޑާއި ގުޅިގެން 2020 ވަނަ އަހަރު ބަންދުކުރި އޮލިމްޕަސް އަދިވެސް ނުހުޅުވޭއިރު، ދެ އަހަރު ވީއިރު ވެސް އޮލިމްޕަސް ނުހުޅުވުމުން މި ދާއިރާގައި މަސައްކަތްކުރާ ގިނަ ބަޔަކު އަންނަނީ ވަރަށް ބޮޑަށް ނުރުހުން ފާޅުކުރަމުންނެވެ.
