ހުވަދުއަތޮޅު، ފުވައްމުލަކު އަދި އައްޑޫ އަތޮޅު، ރާއްޖެ ޓްރާންސްޕޯޓް ލިންކް (އާރްޓީއެލް)ގެ ނިޒާމުން ގުޅާލާނެކަމަށް ރައީސުލްޖުމްހޫރިއްޔާ އިބްރާހިިމް މުޙައްމަދު ޞާލިޙް ވައުދުވެވަޑައިގެންފިއެވެ.
ރައްޔިތުންގެ މަޖިލީހަށް ހުށަހެޅުއްވި ރިޔާސީ ބަޔާނުގައި ރައީސް ވަނީ، ރަށްތަކުގެ ގޮނޑުދޮށާ ހަމައިގައި ހުއްޓިފައި އޮންނަ އިޤްތިޞާދު މުޅި ރާއްޖެއަށް ފަތުރާލުމަކީ، ރާއްޖޭގެ ރަށްތައް ތަރައްޤީވެ އިޤްތިޞާދީ ހަރަކާތްތައް ހަރުދަނާކުރުމަށް އެޅޭ މުހިންމު ފިޔަވަޅެއްކަމަށް ވިދާޅުވެފައެވެ.
އަދި އެކަން ކުރެވޭނީ އިތުބާރާއި ޔަޤީންކަން އޮތް ބަދަހި ދަތުރުފަތުރުގެ ނިޒާމަކުން ކަމަށާއި، ދަތުރުފަތުރުގެ ނިޒާމަކީ ރާއްޖޭގެ އިގްތިޞާދީ އިންޖީނުގެ ގޮތުގައި ރައީސް ސިފަކުރެއްވިއެވެ.
މީގެއިތުރުން ބޮޑުތިލަދުންމައްޗާއި ފާދިއްޕޮޅުގެ ހުރިހާ ރަށެއްގައި އާރުޓީއެލްގެ ނިޒާމް ގާއިމްކުރެވިފައިވާކަން ފާހަގަކުރައްވާ، ރައީސް ވަނީ މި އަހަރު ނިމުމުގެ ކުރިން ހުވަދުއަތޮޅާއި، ފުވައްމުލަކު އަދި އައްޑޫ، އާރުޓީއެލްގެ މި ނިޒާމުން ގުޅާލާނެކަމަށް ވައުދުވެވަޑައިގަންނަވާފައެވެ.
ރައީސްގެ ރިޔާސީ ބަޔާނުގައި ރާއްޖެއަށް ބޭނުންވާ ހުރިހާ ޑޮމެސްޓިކް އެއަރޕޯޓެއް ޤާއިމްކުރުމުގެ މަޝްރޫޢު ކުރިއަށް ދާކަންވެސް ވަނީ ފާހަގަކުރައްވާފައެވެ. އެގޮތުން ހޯރަފުށީ އެއަރޕޯޓް ހުޅުވިފައިވާކަމަށާއި، މި އަންނަ މަހު ފަރެސްމާތޮޑާ އެއަރޕޯޓް ހުޅުވޭނެކަން ވެސް އެމަނިކުފާނު ފާހަގަކުރެއްވިއެވެ.
އެމަނިކުފާނު ވިދާޅުވީ، މާލެ ސަރަޙައްދުން ބޭރުގާ ހިންގޭ އެއަރޕޯޓް އެޅުމުގެ އެންމެ ބޮޑު ދެ މަޝްރޫޢު މިހާރު ކުރިއަށްދާކަމަށެވެ. އެގޮތުން ހަނިމާދޫ އިންޓަރނޭޝަނަލް އެއަރޕޯޓްގެ ޢަމަލީ މަސައްކަތް ފެށިފައިވާ ކަމަށާއި، އަމާޒަކީ ހަނިމާދޫ އިންޓަރނޭޝަނަލް އެއަރޕޯޓްގެ އާ ރަންވޭ، މި އަހަރުގެ ފަހު ކުއަރޓަރގައި ނިންމުން ކަމަށް ރައީސް ވިދާޅުވިއެވެ.
އަދި އައްޑޫ އިންޓަރނޭޝަނަލް އެއަރޕޯޓްގެ ޢަމަލީ މަސައްކަތް ފެށުމަށް މިމަހު ހަވާލުކުރެވޭނެ ކަމަށާއި، މިއީ ރާއްޖޭގެ އެންމެ އުތުރާއި، އެންމެ ދެކުނަށް އަހަރަކު ޖުމްލަ 2.8 މިލިއަން ފަސިންޖަރުންނަށް ޚިދުމަތް ދެވޭގޮތަށް ތަރައްޤީ ކުރާ ބައިނަލްއަޤްވާމީ ޒަމާނީ ދެ އެއަރޕޯޓްކަން ރައީސް ފާހަގަކުރައްވައެވެ.
މުޅި ރާއްޖެ ދަތުރުފަތުރުން ގުޅާލުމަށް ސަރުކާރުން ފަށާފައިވާ ޤައުމީ ފެރީ ނިޒާމު، އާރުޓީއެލްގެ ޚިދުމަތް ފެށީ ބޮޑު ތިލަދުންމަތިންނެވެ. އާރްޓީއެލް ފެރީތަކަކީ ހިތްފަސޭހަވުމުގެ އިތުރުން، ޖީބަށް ލުއި، އެ ޚިދުމަތަކަށް ރައްޔިތުންނަށް ބަރޯސާވެވޭނެ ޝެޑިއުލްއެއް ކަނޑައެޅިފައިވާ ޚިދުމަތެކެވެ. އަދި ޙާއްސަ އެހީއަށް ބޭނުންވާ ފަރާތްތަކަށް ފަސޭހައިން ބޭނުންކުރެވޭ ފާޙާނާއާއި، ރޭމްޕަކާއި، ސްޓްރެޗަރއާއި ފުރޮޅުލީ ގޮނޑި ބަހައްޓާނެ ޖާގަ މި ފެރީތަކުގައި ހުންނާނެއެވެ.
